謝安琪（Kay）今日喺中環出席美容產品活動，分享護膚心得，佢對自己皮膚好有自信，因為作息定時及飲食控制，從生活習慣着手，揀護膚品方面亦都會嚴選。至於老公張繼聰嘅皮膚，Kay就話：「男仔俾心機做運動，魅力來自另一樣嘢，運動呢樣嘢令我好滿意。」

Kay近日為麥浚龍（Juno）新歌《勇悍17》擔任MV女主角，情節交代兩人去時鐘酒店開房，Kay話：「故事講我哋17歲相識，對方好勇猛急不及待要生BB，結婚大住肚上大學，橋段係不一樣的浪漫，將呢個角色交畀我都好有趣，真實嘅我比較拘謹保守，呢位女主角就好任性，同我現實反差好大。」

Kay坦言現實冇去過時鐘酒店，今次係第一次好緊張：「去到個環境所有工作人員都好怕醜，氣氛好緊張，明明嗰場戲都只係交代我哋入咗時鐘酒店，喺個櫃檯畀錢，冇咩事發生。」首次踏足時鐘酒店阿Kay不禁在場地四處張望，佢話：「有10幾個男人一齊工作，都唔到我尷尬，但氣氛真係好尷尬，好多謝Juno令我平靜生活中帶來咁多波瀾。」

問到Kay要唔要同老公張繼聰去時鐘酒店體驗？佢笑笑口：「唔使啦，喺虛構故事體驗咗就夠，人生平淡啲就得，我都有同老公講去時鐘酒店拍攝，佢叫我去見識吓，佢都曾經去過呢種場地拍攝有經驗，o依家我哋經驗睇齊。」

Kay話未來和Juno會推出合輯，當中有10幾首歌，圍繞愛情故事。同Juno保持親密，會唔會令老公呷醋？Kay話：「唔會啦，我老公好尊重創作，唔好睇佢咁大隻，佢好欣賞浪漫作品。」

精選娛聞，喺晒《娛果》
http://fb.com/appledailyent