韓國男神金秀賢、Sulli、成東日等人主演嘅新片《Real》，後日正式喺韓國公映，令粉絲相當期待。

新片今日率先舉行媒體試映會，金秀賢、Sulli及趙宇鎮就孖住導演現身，一身西裝打扮嘅金秀賢相當體貼地拖住着高踭鞋嘅Sulli上台，而身穿黑色連身裙嘅Sulli就微微谷胸現身，不過未知係咪宣傳新片前一直處於休息狀態而食多咗嘢，Sulli今日現身時明顯肥咗，手臂及腰都粗咗。

對於Instagram貼文引起嘅爭議，Sulli表示係關於佢個人嘅事，唔適合喺呢個場合回答，避答一切相關嘅提問；及後再次被問到片中與金秀賢嘅床戲，Sulli表示：「係一個好大嘅挑戰，有考慮過拍唔拍，不過我認為(床戲)亦係劇本中重要嘅一幕，所以鼓起勇氣拍攝。」

而現年29歲嘅金秀賢已屆韓國入伍嘅年齡，有冇收到入伍通知？金秀賢表示：「目前仲未收到通知，所以都未知入伍嘅實際日期，如果情況許可，我都想再拍多一齣作品先入伍。」