韓國女團少女時代（少時）人氣成員允兒本月30號迎來26歲生日，不過因為正日允兒有其他日程，所以只好提早到前日舉行生日會，同粉絲一齊慶祝。而據知今次生日會仲係允兒自己要求同粉絲一齊過，只為能夠同粉絲見吓面，真係識得冧粉絲！能夠同粉絲一齊慶生就當然開心喇，不過當全場拎住「允兒生日快樂」手幅，又大合唱生日快樂歌時允兒即刻感動到喊。

而忙完一日嘅允兒就喺噚日更新Instagram，一連上載咗三張生日會現場嘅相，有同粉絲一齊影嘅大合照，亦有單人對住鏡頭飛吻嘅獨照，允兒仲留言寫住：「無論係喺韓國定喺海外，多謝一直支持我、喜愛我嘅SONE（少時粉絲名稱）。」相中允兒着住連身裙，頭載住大型兔仔頭箍，望住鏡頭笑得相當甜。而允兒仲十分識做，坐喺最前面等粉絲可以勁近距離望吓佢。而粉絲都紛紛留言大讚允兒靚女又得意，雖然仲未到佢正日生日，亦有唔少粉絲留言祝佢生日快樂，相信允兒見到都覺得開心。

另外，少時前成員Jessica早前為雜誌《THESTAR》拍攝嘅新相亦喺噚日被公開，相片盡顯其清純氣質。佢接受雜誌訪問時又再次提起妹妹Krystal，Jessica話同妹妹有好多共同話題，但講得最多嘅就係「食」，似乎暴露咗佢「吃貨」嘅一面。