有朋友來電話通知,《信報》網站曾出現一位署名「左丁山」嘅網民,對時事發表意見,朋友問:「是否你嫌GG細語太少字,唔夠你寫,要到《信報》網站發表意見?」
左丁山當然立即否認,本人從來冇在其他地方以左丁山之名發表過專欄或月旦時事。左丁山只在《蘋果日報》獨家發牙痕、寫幾句啫,《信報》網站論壇上之左丁山,與《蘋果日報》GG細語之左丁山,係兩個完全不同嘅人。別人要用左丁山呢個筆名,都唔知係擦左丁山鞋還是有意誤導,管佢唔到。
講開網站,左丁山後知後覺,前日先至識得登上2008.i-cable.com睇奧運新聞、圖片及直播畫面,自己懶醒,打電話畀有線電視肥佬C,恭喜佢做得好,點知肥佬C話:「你𠵱家先知道我哋有好嘢?我哋已累積得到一億點擊咯噃,串流影片發放超過一千萬段㖭,你背啲喎。」咁又係,講畀秘書聽,秘書話佢已經喺公司睇咗一個禮拜,驚左丁山話佢蛇王,唔敢出聲啫,肥佬C又來電告知,睇有線網站之外,高清電視台直播好多節目,例如佢買唔到飛入沙田馬術場,就在屋企睇高清電視嘅馬術直播,睇到馬匹與選手嘅動作,絲毫畢現,十分精彩。左丁山在馬術場咁多日,知道好好睇,但有啲乖巧動作,確係睇電視近鏡更加美妙。之不過,現場氣氛好唔同,各國在港僑民手揮國旗吶喊之熱烈氣氛,坐在屋企電視機旁邊無法感受得到。在現場亦清楚知道,晚上原來有好多航機經過馬場上空往大嶼山降落,飛機聲有時好嘈,容易嚇親在比賽中之馬匹,此乃沙田馬術場之缺點。不過咁,香港地方咁小,地皮咁貴重,唔在沙田舉辦馬術賽,仲有邊度可以?香港特區政府更加唔可以學習北京,指令飛機停飛及限制國際航機班次,冇符!總之馬匹受驚嚇之機率均等,各安天命可也。
睇電視轉播之一個唔好處,就係評述員唔掂,如《蘋果》娛樂版所言,成日講廢話,時時講「好勁呀」,「好厲害」,「好嘢」之類,用詞貧乏。肥佬C話佢哋網上直播京奧閉幕禮,會推出一個原汁原味無香港評述嘅「無肺話版本」,叫左丁山千萬留意。