盧海鵬、蘇姍同埋大馬歌手黃明志等今晚喺旺角出席一個歌唱大賽活動，喺活動進行嗰陣，場外出現咗一架貼大字報既深色貨Van，大字報上便寫住昇輝老闆鄭錦輝及陳安麒個名，之後仲見到有警察喺架車度搜查兼抄牌，之後在場啲記者諗住搵喺現場嘅鄭錦輝了解，但公關話佢因公事繁忙已離開咗，所以了解唔到呢件事。蘇姍話唔係好清楚呢件事，淨係知道佢有份搞呢個活動。

個歌唱比賽係玩扮聲嘅，問到鵬哥平時扮咁多人有咩秘技，佢話冇乜，又笑言怕比人打:「不過O依家少咗好多呢啲事。」怕激嬲人?佢話:「好多人都試過o架，以前都有啦。」問最鐘意扮邊個?佢就話:「我咩人都扮過，邊個都鐘意，男定女都扮，幾廿歲都扮過靚o模。」

有冇接班人?鵬哥話:「我都冇教人，唔可講接班，都係睇天聰。」咁邊個扮得叻?佢話:「祖藍都OK，輸在身型，我扮阿肥時冇咁肥咪加啲嘢，靠服裝化妝。」有冇人扮過你?鵬哥笑言:「邊個會夠膽扮我，最難扮係我。」

黃明志就話聽日走，佢之前喺fb話香港方面要佢開騷前簽咗張唔可以講大馬同中國政府嘢嘅合約，問o依家搞成點?佢話:「OK嘅，主辦單位幫我搞掂。」要特別審批?佢話:「唔知，大會會幫我處理。」啲歌好政治?佢話:「其實因為馬來西亞有啲歌會較敏感，直接去話啲人，有啲人會難以接受，但都係關於大馬事，唔關香港事，其實自己好多歌都娛樂性，香港人識嘅都係娛樂性嘅歌。」

咁樣會好難去內地?黃明志就話:「打算緊，之前諗住去台灣，香港發展，剛喺台灣做完騷。」會特登寫歌關於台灣香港政治?佢話:「唔會特別寫，自己住喺大馬，覺得有啲地方對華人有啲唔公平，發自內心感受。」驚俾人抨擊?佢話:「我都抨擊人哋預咗俾人抨擊返。」