唔經唔覺，楓葉國出產、高級行政人員身份象徵嘅黑莓（BlackBerry），原來已經面世10年，有咩慶祝？以華華睇法，以前幾乎獨霸智能手機武林，今年最好嘅節目就係「變陣」，硬撼當紅嘅蘋果iPhone！據RIM（生產黑莓嘅公司）亞太區副總裁Norm勞偉強（圖）講，公司唔會整部特別版黑莓出嚟，但就會加強教育吓消費者，事關黑莓好多function，其實唔只行政人員先啱用。

高層話教消費者用黑莓

但佢哋因應市場走勢，推出首部touchscreen黑莓Storm（即係市場認為用嚟迎戰iPhone嗰部），一句講晒，佢哋最大嘅策略係畀消費者有選擇。
咁口講無憑，iPhone實在風頭一時無兩，又加埋金融海嘯，到底黑莓有冇俾蘋果「壓死」呢？阿Norm話，睇返RIM自己條數，截至今年5月底嘅2010財政年度首季度營業收入比舊年同期升53%，有成34.2億美金，新增黑莓用家有380萬個，升咗65%，截至季尾全球共有2850萬個黑莓粉絲。
據市場調查機構IDC數據，上季美國智能手機銷售頭6位中，黑莓佔4款，蘋果兩款iPhone排第2同第4。睇嚟呢粒黑莓的確夠「硬淨」！