啱啱過咗嘅禮拜五，滙豐翔龍中國基金（820）首日掛牌，個價就急升20%，好多網友都估唔到，連基金都可以升得咁癲。Ymancwm話：「成班儍仔當股票咁炒，基金有溢價，除非佢揸住嘅股票有賺啫，唔係點值咁嘅錢，但家吓連佢揸啲乜嘢股都未知，咁升法點合理。」
Joeymok覺得：「基金當新股咁炒，好搞笑，真係『先瘋狂，後死亡』！」有危就有機亦同意：「基金都可以炒到咁高，真係要開始睇淡，股市跌之前就要令你咁瘋狂。」

賺到錢就係好股

JacksoHk就話：「隻基金話咗畀人知，只值10蚊嘅價錢，家吓升得咁勁，表現仲好過隻復星（656），都唔知乜嘢世界？」不過，Ghost2800相信：「如果你係睇長線，喺乜嘢價位都可以入；但如果覺得股市喺未來呢幾個禮拜會大調整嘅話，就可以等吓先再入。」
胸毛一人認為：「唔好理佢升得合唔合理，總之一句講晒，賺到錢就得！學鄧小平伯伯名句話齋──『唔理黑貓定白貓，捉到老鼠就係好貓』！」
http://www18.discuss.com.hk/viewthread.php?tid=4781640&highlight=%B5%BE%C0s