近期無綫J2台有個好似《電波少年》咁嘅節目，叫《Circus香港大爆走》，嚟緊呢個星期六就首播啦。個節目係由台灣組合Circus以背包客形式玩轉香港，佢哋嘅挑戰就係3個人留喺香港十幾日，但連機票比得1萬蚊港紙佢哋用，聽到都知唔夠啦!所以Circus三子要住有香港特色嘅劏房，真係慘慘豬。

Circus三子廖人帥、黃尹宣（Eason）同埋林柏昇（Kid）今日就來港去到旺角宣傳，同粉絲玩遊戲唔少得，仲同街頭藝人齊齊jam歌，Kid有感而發話:「香港是國際化的大都市，我們以為大家都有錢又開心，深入了解之後，就用我們年輕人的角度，感受到香港人的辛苦」。

成員廖人帥又話:「(TVB)高層說香港人近幾年比較不開心，壓力也很大，所以希望我們用年輕人的角度帶給大家歡樂，也可以讓大家發洩一下」。好用心良苦喎。不過節目入面玩嘅遊戲已經有網片疑似抄襲，Eason就話：「如果真的是我們的榮幸，也激發我們想更猛的遊戲，不過我們所以內容都是自己製作，跟其他節目不一樣，希望大家感受到我們的努力與熱情」。