三月上市公司業績高峯期，噚日由大笨象滙控（005）揭開序幕。講起滙豐，一定要講吓CEO紀勤「順應民意」捐花紅單嘢，事關佢嘅對手渣打CEO冼博德疑似「焗跟」。英國《電訊報》報道，德哥計劃捐200萬鎊嘅花紅畀慈善機構，但暫時無渣打人證實係咪堅料！
Well，德哥帶領之下，渣打響海嘯無乜頭暈身㷫，股東錫到佢燶，有花紅落袋都係應份，家仲話自動自覺「豪」嚟回饋社會，唔使群情洶湧先做，齋計賺到嘅社會輿論，捐200萬英鎊都算抵喇！Bytheway，唔知仲有無人效法，為bankers喺社會度攞番啲分呢？

小殼王接棒登場

大笨象當然係焦點所在，但財金圈都有其他人同事值得講嘅！先講兩單「父業子當承」嘅故仔。第一單係「小殼王」登場，德祥地產（199）宣佈，委任26歲嘅陳耀麟做執行董事，月薪一萬銀，陳生係乜水？德祥股東之一、「殼王」陳國強之公子是也。
另一單係福田實業（420），由1993年已經加入集團嘅45歲太子爺夏漢權，終於由非執行董事調任做執行董事，拍埋「小殼王」度比一比，唔知夏生會唔會覺得自己個老竇夏松芳「慢」呢？

神華陳必亭轉戰金山

睇完登基，又睇睇猛人撐場。轉型搞煤礦嘅金山能源（663）噚日宣佈，「以強勢陣容進入業務新里程」，咁有幾強呢？唔係管理層新班底，應該係新成立嘅顧問委員會！要員雖然只得三丁友，但件件都幾刺眼（好猛）──前神華集團董事長陳必亭、前山西省省長王森浩，同埋前網通集團高級副總裁張長勝……人腳就好似嚿金咁耀眼喇，但金山到底有無金掘呢？拭目以待！

李華華
mailto:[email protected]