中國通訊社正式公布,中聯辦前秘書長蔡小洪,因為向西方國家出賣情報,犯咗間諜罪行,現正接受審查。
蔡小洪雖然對香港人名不見經傳,不過喺中共黨內,佢家世顯赫,就係王穎妤小姐所形容嘅BlueBlood(呀,唔係,共產黨係赤色嘅,所以應該係RedBlood至啱)。蔡小洪佢令尊翁,名叫蔡誠,曾經追隨中共特務之父周恩來搵食,並接受港澳辦祖師爺廖承志領導,長期喺國民政府時代嘅上海做特工,正所謂「根正苗紅」。
中聯辦秘書長,對內管理組織人士,對外亦眼觀四方。亦即宮廷大內總管。冇番三代審查,共黨又點會放心,連蔡小洪呢亭正牌共幹,都做咗西方國家嘅間諜,並斂財五六百萬,都咪話唔好笑。消息傳出,中環一批紅酒鋸扒族,紛紛私語。有啲口痕友話:嘩,共黨愈畀心機栽培嘅,就愈係無間道,咁阿董又有冇機會係西方國家嘅卧底呢?
阿董宰殺香港金鵝
因為,阿董最初由肥彭親自提拔,擺佢喺行政局,栽培咗五年,以肥彭咁眉精目企,冇理由唔知道阿董嘅常識有幾多斤両。有乜理由中方當初由肥江握手欽點阿董,肥彭等英方官員齊齊稱讚,話係深慶得人?六年幾以來,阿董有本事將香港嘅帳面資產蒸發咗成三萬億,親手宰殺呢隻金鵝,尤其係將肥彭遺留嘅「母語教學」毒藥政策加大力度去推,搞到特區英文低落,斬斷同國際之間嘅紐帶。如果搵長毛做特首,都冇阿董咁超勁殺傷力。