(新增回應)

48歲嘅唐文龍早前喺《溏心風暴3》同陳敏之拍完床戲，人氣再度急升，連帶佢嘅感情生活亦都被注視，一直冇女埋身嘅唐文龍，成日俾人傳佢同好兄弟劉永健玩hehe，不過唐文龍聲稱自己係鍾意女人，冇耐仲傳佢同無綫36D新晉咪神黃文意（Mandy）暗撻半年。（新聞連結： http://bit.ly/2HOqTCk ）

不過呢段戀情嚟得快又去得快，事後有指Mandy靠唐文龍上位，搞到佢喺ig撰文反擊，事後唐文龍斬釘截鐵話同黃文意冇開始過，但係佢都維護對方，反而最介意係俾人公開歲數。(新聞連結： http://bit.ly/2ppHlBo )之但係人係需要朋友，唔好理男定女，總之啱傾咪約吓見面，唔使理其他人點樣講！

日前傍晚6點左右，見到唐文龍全黑打扮現身銅鑼灣嘅時代廣場，同行嘅仲有一個女友人，但係佢哋冇乜嘢親熱嘅舉動，雖然大家邊行邊傾，不過唐文龍嘅表情比較嚴肅，指手劃腳動作多多，行到咁上下，唐文龍人有三急要去洗手間，女友人就企埋邊撳電話邊等，之後就齊齊行去停車場拎車走人。

唐文龍今日回覆《蘋果》話﹕「嗰位只係我前經理人，咁都俾人影，好慘。」

精選娛聞，喺晒《娛果》
http://fb.com/appledailyent