誰不想季季逢春，賞閱人世繁華，然而時艱時有，病毒四面來，八方去，市面蕭索，人面全非。日子是枯是榮，皆葬於時間滄海裏，好歹應該活一場，無悔今生。學校關門，人生課堂未完，好些人繼續學習，高呼my class will go on。

中年人用Zoom上音樂課，甚至當街吹色士風，為愁苦帶來一抹浪漫；採訪這個音樂班，才知《My Heart Will Go On》不止是一首歌；婆婆上不了茶樓，用平板電腦玩點心遊戲，當作吃了春卷、粉果，兼練腦筋；facebook live兒童班的家長告訴記者，今次疫情是一期一會的親子契機。

撰文：陳勝藍
攝影：謝榮耀 許頌明

東涌Kenny G改用Zoom上課

這天退休公務員Stanley吹奏一曲《雨夜的浪漫》，其實訪問時無雨，但大家都看不見晴天，正好用得上這份浪漫。他行年67，是基督教香港信義會男爵樂團色士風手，疫情下團員不到課室，改用Zoom上堂。此時Stanley對着電腦獨奏《忘不了》幾次，總是拿捏不準。

老師隔了個屏幕，不能手把手教，只好挖空心思引導，說：「唔好係咁高音大聲，低音細聲。高音放輕，成段先至靚。」「腦海入面有冇你覺得好動聽嘅saxophone聲音？用樂器展現出嚟。」最後叫Stanley放下樂器，乾脆唱出《忘不了》，他卻又不諳國語，「咁就哼出嚟」。哼曲既罷，再用色士風吹出來，果然順暢多了，他抹把汗，老師鼓掌。

網上獨奏還可，合奏划不來，Stanley解釋：「我見過YouTube用5G，四個不同地方，四個國家合奏；我相信依家（4G）有些少延遲，傾偈冇問題，但夾歌未必夾得準。」家住東涌，疫情下少上街，多練習。話說他一直愛聽音樂，退休後加入男爵，「自己嘲笑自己，跟人話我臨老學吹打，自嘲一下。冇所謂啦，我（玩音樂）自我陶醉啫」。自此家中有個樂手，孫兒慶生，色士風吹出生日歌。

我們也訪問了Stanley的同學郭先生，他吹小號，俗稱小喇叭，看來臨老學吹打更適合形容他，談下去才知這位退休商人早在半世紀前便接觸這玩藝，他說：「大約50年前我讀中學嗰陣玩過六年，當時我喺校隊吹主音，1968年中學畢業離開學校之後就冇再玩，放低咗50年。後生要奔波搵食，香港地邊有時間安排我再跟佢結緣？」怎想到兩年前加入男爵，重溫舊夢。

武漢肺炎對郭先生的影響可就大了，12年前通過波仔，近來心臟位置不適，原定2月中到威爾斯親王醫院進行心導管檢查，如有阻塞即場處理。疫情兇猛，非緊急手術讓路，醫院將他延後10個月，「如果我有問題，醫院唔肯做，私家醫院我都要去」。訪問這天郭先生對着屏幕獻技，記者沒要求，他本人也未必有意，偏偏選了《鐵達尼號》名曲《My Heart Will Go On》。記者祝福他平平安安，his heart will go on。

黃婆婆用平板食點心睇Youtube

「鳳爪！叉燒包！」公屋單位傳出喝喊聲，似叫賣點心，原來黃清惠婆婆用平板電腦玩遊戲。玩法如下：第一頁出示一籠點心，第二頁羅列三籠，考你剛才是哪籠。她逐一數出：「糯米雞、叉燒包，佢叫做⋯⋯一下唔記得！」在場社工提醒：「鹹水角。」哪籠才是正確答案？黃婆婆答：「潮州粉果！」三個選項都不是潮州粉果啊，「唔記得。」

社工說：「姑娘畀貼士你啦，綠色包住嘅。」這位遊戲玩家喃喃說：「綠色包住⋯⋯」「再畀貼士你，裏面有飯嘅，呢三個邊個有飯？」「糯米雞！」「啱喇，犀利！」之後她更犀利，答中鳳爪、叉燒包。疫情之前不時上酒樓，問她最愛吃款點心，畢竟90歲了，記不起，只說：「長長地嗰啲。」社工問：「腸粉？」「唔係。」「糯米卷？春卷？鮮竹卷？」「係春卷！」今時不同往日，她打機當作食點心。

遊戲鍛煉長者的認知能力，即使黃婆婆這方面正常，也覺得腦筋快了，「不過我未同人哋比過，我同我老公比，我覺得快好多。」她出示遊戲所得分數，記者發雞盲，看成2萬幾分，「廿幾萬呀！」似乎我更需要玩這遊戲，而同一遊戲丈夫得分3萬幾，她果然大勝。另外她又依着系統做簡單運動。

「生活再動計劃：賽馬會居家安老新里程」由信義會社會服務部推行，賽馬會贊助，為體弱長者提供平板電腦，內含79條居家運動短片，21個認知訓練遊戲，並有儀器讓老友記自行量度血壓、心跳、步數、睡眠狀況、血糖、血氧、體重，以及如今大家最關心的體溫，一旦出現異常指數，系統即時通知專責醫護團隊及長者家人。目前逾300名長者使用這項服務。

計劃包括流動數據，黃婆婆最愛上YouTube學煮食，這天邊看邊說：「香蕉煲水未食過！」「唔係咁樣批雪梨！」有節目教人將凍肉放在兩個鋁盤之間，不消幾分鐘便解凍，她說：「呢個我知，同我做嘅一樣。」喜愛《頭條新聞》、《蘋果日報》，她當然是在YouTube看，計劃經理鄧玉英考慮為長者訂閱《蘋果》，她說：「我哋想有啲報道中肯啲！」

黃婆婆暮年好學，因為兒時沒機會讀書，看舊照她年輕時長得像《花樣年華》的張曼玉，但再花樣的年華也有考驗，她熬過癌症，捱過沙士，「嗰陣時可能驚啲疫情，依家死咪死囉，怕咩啫，終歸都要去嗰條路，已經夠喇！」生死看得開，防疫要做足，「預防肺炎呀？少去啲街，戴啲口罩，人多嘅地方唔好去囉，佢唔講我都知啦！」

全天候陪伴6歲孖女關係更好 冼太：珍惜這段時間

玩在瘟疫蔓延時，老人家與幼童並沒兩樣，信義會王賽明快樂家庭培育中心針對幼稚園至初小學生，用facebook live每周上兩堂，每堂半小時，又玩又學。這天社工們比賽爭勝，6歲孖女與媽媽爭相高叫所支持的社工名字，很有馬場風味。

課後記者問孖女喜歡疫情下的悠長假期還是上學，大孖Bella答：「兩樣都鍾意。」話音未落妹妹Anna打了個噴嚏，似有所指，她說：「（鍾意）依家喺屋企多啲，有得同阿姐一齊坐！」原來二人同班不同坐。再問Anna在這網上課堂學到甚麼，她說：「要開心啲，唔好成日唔開心！」也說得是，疫情下太多愁雲慘霧。

社工霍芳婷表示，很多家長認為停課最難捱是一家人困獸鬥，「本身返咗學有個空間，大家可以唞唞氣，突然因為停課，長時間留喺屋企，大家壓迫感好大，磨擦好多。」這就是網上課堂的由來，「唔通畀部手機佢（子女）長睇到4月20號？又唔得，於是成班同事諗，不如玩互動遊戲。」原本打算每堂讓家長喘息半句鐘，未料看得最開心的卻是大人。

孖女母親冼太是全職媽媽，她訴說疫情首兩周全家緊張，不敢出外，結果「炒埋一碟」，之後放輕鬆了，又有了口罩，一家出外做運動，但始終整個宇宙只有四個人，她承認：「每日生活唔係你就係我，老實講有啲枯燥。」一天看見中心有直播，也看見曙光，「我原本諗住掉低佢哋自己睇，好似霍姑娘咁講，點知自己睇埋一份，都好開心。因為成個假期唔係我諗嘢出嚟玩，就係佢哋諗嘢出嚟玩，突然有個人幫我諗遊戲，有人做咗主導。」

病毒蔓延全球，好媽媽看得多麼正面，「平時佢哋返咗學，我有自己私人嘅事，但基本上依家唔係自己cancel就係被cancel，既然cancel晒，不如全心全意陪佢哋，珍惜呢段時間。我相信人生唔會成日有呢啲事情發生，我覺得係天災，如果全心付出咗，大家平安無事，就係經歷、回憶；就算有事，我全心全意付出咗，唔會有遺憾」。孖女說現在跟媽媽關係更好，「因為可以虐待媽媽！」

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架