中學會考對好多後生仔嚟講，係人生一個轉捩點，今年仲撞正末代會考，好多考生覺得應該紀念一下。噚日網上討論區有人post咗幅靚相出來，相裏面清楚見到有張會考卷嘅電腦條碼紙，考生編號、試場編號及座位資料，出帖者話今年係最後一年會考，所以要留番個紀念。

稱參加無記《超級巨聲2》

八方雖然係N屆之前嘅會考生，但都知道考生唔可以將條碼貼紙帶離試場或者喺試場拍攝。呢位考生出事，網友立即起底，唔使兩個鐘大家已經搵到疑似當事人。呢位自詡靚仔嘅陳姓考生係荃灣區一間中文中學嘅考生，今年應該係重考中文科。呢位哥哥仔仲喺fb透露，除咗會考，佢仲有另外一個考驗，就係參加咗無記嘅《超級巨聲2》歌唱比賽，佢仲喺fb開咗個fanpage，有成146個朋友like。
阿靚仔又話，自己唔係個post嘅發帖者，畀佢知道邊個害佢就死硬；不過佢就認張條碼係佢本人嘅，佢唔希望因為呢件事成名，家最驚唔係俾考評局扣分，而係怕俾人起底。其實佢都唔使擔心，因為底已被起。考評局就話，如果考生違反考試規則，局方一定調查跟進，違規考生會被扣分處理。