鄭秀文（Sammi）撐廣東歌推出廣東大碟，仲用咗過百萬元，為新歌《Creo en Mi》拍MV（新聞連結：　 https://bit.ly/2CmS5t6　）。Sammi嘅努力冇白費，廣東歌真係有人撐，2星期內MV嘅點擊已過百萬，知道消息之後Sammi既興奮又感動，除咗再次多謝公司不惜工本咁支持，仲希望帶出一個訊息：「守護凡事嘅價值，不論係廣東歌、國語歌、英文歌、泰文歌，只要好聽嘅歌，不論任何語言都要好好愛惜當中嘅價值。容許我咁講，廣東歌有啲似一棵小小就嚟枯乾、枯竭嘅植物，但如果我哋用愛心、用水、畀啲太陽溫暖佢，可能會激發到佢生命力，會生出更靚嘅花。所以我希望同唱片公司一齊出少少綿力，將咁正面嘅訊息帶出去！」

另外，Sammi仲要多謝小師弟Jackson（王嘉爾）嘅創作，令首歌生色不少：「呢首歌係我同Jackson（王嘉爾）嘅共同作品，係我哋合唱歌，佢喺原曲上加咗好精采嘅Melody，特別係我哋對唱嘅部份，同埋佢個人Rap嘅部份，都令呢首歌層次更加豐富、令呢首歌再加分，所以我要好多謝Jackson。亦好多謝呢首歌MV嘅導演比爾賈，佢好努力實行我對呢首歌嘅睇法，佢亦有好好嘅idea，例如淋紅油、石像漸漸裂開等。仲有多謝攝影師和剪接師，令MV故事非常完整，好多震撼畫面都嚟自佢哋嘅功勞！」

精選娛聞，喺晒《娛果》
http://fb.com/appledailyent