一連兩場嘅紅館演唱會《Shine Moment Live 2018》，噚晚順利喺紅館完成尾場演出，依然座無虛席。兩位成員徐天佑同黃又南同頭場一樣落力又唱又跳兼除衫騷肌。

繼頭場邀請到許志安同楊千嬅擔任嘉賓，尾場首先就請到AT17同佢哋合唱《曼谷瑪利亞》，成員林二汶唱完歌後問天佑：「其實我哋唔算好熟，點解會搵我哋嚟做嘉賓？」天佑就話其實大家係同一個時期出道，現場螢光幕放出佢哋四個人當年做新人嘅合照，盧凱彤就笑言：「我當年係未成年嗰個，咁多年嚟你哋都無咩點變，唔熟唔緊要，得閒打下邊爐就熟㗎啦。」

至於另一對嘉賓Twins就喺Encore時段出現，同Shine 一齊合唱《明愛暗戀補習社》，天佑同又南都話Twins早佢哋一年出道，所以阿Sa阿嬌係前輩，然後又一齊恭喜 快將成為人妻嘅阿嬌，阿嬌尷尬地笑住回應：「多謝，我都唔知講咩好。」

天佑表示同阿Sa阿嬌兩人喺電影合作較多，又南回憶往事話：「我記得之前阿Sa話過我哋第一次見面嘅時候無打招呼。」阿Sa就話：「我唔記得有咁講過，你咁記仇。」阿嬌亦都話：「咁耐嘅嘢你都仲記得，你真係好記仇。」阿Sa亦稱天佑好似佢嘅初戀男友 ，佢話：「我初戀男友好似郭富城。」身旁嘅阿嬌就話：「天佑靚仔過郭富城，今日係佢主場，佢一定靚仔啲。」

演唱會尾段唱《祖與占》時，又南一度感獨落淚，到唱完最後一曲《鼎鼎大名》後，觀眾未肯離開，結果天佑同又南要再度返上舞台進行第二度Encore，多唱一首《勁愛你》後，大家先肯收貨離場。

完騷後兩人接受訪問時都話：「為咗今次演出排練咗幾個月，我哋呢段時間日日見面，每日十幾個鐘，依家做完騷，聽日應該會有啲失落，不過就可以休息吓。」兩人表示今年希望多造幾首新歌，天佑話：「近幾年都無做過歌，希望今年拍戲之餘都可以抽時間造音樂。」講到嘉賓AT17同Twins，佢哋話：「我哋大家係當年商台叱吒組合獎嘅得主，事隔咁多年，於是就想今次一次過邀請晒佢哋嚟出席。」

精選娛聞，喺晒《娛果》
http://fb.com/appledailyent