有冇印象去年底嘅區議會選舉,有班三點式艷女喺旺角街頭為候選人助選?冇錯嘞,就係當時油尖旺區參選人,即係着過女裝、有過羊羊同楊芷晴等網名、又曾被稱昭明公主、原名鍾銘麟嘅中出羊子呈獻!佢出色嘅宣傳,輸選舉贏賞識,今屆新界西出選,網民最期待呢批辣妹再次陪佢遊街,當然前提係佢參選資格唔會被取消,皆因政綱寫明「展開國民外交,大範圍搞港獨」。
最後一個重量級人物(係真係好有重量㗎!),點可以數漏正義聯盟李偲嫣?因為出版聞菊P相圖輯《情書》而人氣急升嘅李偲嫣,決定喺新界東作法,之前地區宣傳已經惹嚟廣泛注意,嗰股佢一舉手一投足獨有嘅氣勢,認真巴閉!咁佢成為候選人嘞喎,網民最想睇到乜?相信都係點樣喺論壇語出驚人,但唔少人料更加期待,佢再以制服造型迷倒眾生……wow,諗起都暈一暈咯!