煲呔走馬上任做新特首，當然大大需要人才幫手，可惜有啲公僕一早俾老董搞到意興闌珊，返唔到轉頭，好似梁寶榮咁，九八年十月俾特區政府派去做駐京辦主任，一去七年，竟然冇人肯接棒，搞到寶雲一次又一次請辭，舊年夠鐘退休都冇得走，要同老董頂多一年。
八方聽聞，寶雲喺煲呔當上特首前，已同港府講清楚，今年九月一定走，冇得再講人情，煲呔都冇晒辦法，最後只好放人，自己想辦法。其實，寶雲已經仁至義盡啦，不過喺大陸打滾咗咁多年，人脈當然唔錯，知情人士話佢已經搵到一份好工，做大陸生意嘅，所以唔走唔得。

中國近年迅速崛起，有大陸連繫嘅人十分值錢，真係大把嘢做，所以八方都唔明，點解冇人肯上京，其中一個原因可能係犧牲好大，做到常秘級當然想喺香港大開拳腳。
如果大家記得，當年有個親京人士話，特區政府派人駐京，唔應該係低級，驚北京以為香港唔重視，當時提出嘅人肯定為咗擦鞋，但老董居然又肯聽，搞到當時普通話唔係咁好嘅梁寶榮，都要去北京。
其實，當時特區政府都唔係幾夠人，𠵱家政府新人事新作風，應該唔使做埋啲假大空嘢，所以煲呔可以諗諗，唔使要到D8咁高級做駐京辦主任，退而求D6就多好多人揀，係嗎？


爆料熱線：29290000、27860099
報料傳真：26239278
報料電郵：[email protected]