APPLE位於IFC嘅香港旗艦店即將開幕，面積有成近四個籃球場咁大，係威係勢，專做「上等人」生意嘅1010都唔執輸，上個月喺中環搞咗間兩層3,000呎旗艦店，以過千萬搞裝修，打造1010客戶嘅高級「尊貴會所」，畀客人過足癮。

真皮梳化上睇3D電視

如果中環OL食完晏行厭咗馬莎同埋H&M，不妨去中環威靈頓街、鏞記隔籬嘅1010全新旗艦店。踢走萬寧同PacificCoffee嘅1010，用咗短短一個月變咗呢間旗艦店出嚟，成間店由頭豪到落尾，客人喺店內可戴上眼鏡睇3D電視，體驗1010嘅流動4G技術點樣極速下載。聽聞最「揼本」係全場嘅傢俬，真皮梳化真係坐得人好舒服。
八方一入到去旗艦店，已經聞到一陣香薰味。CSL大眾客戶市場總裁梁淑儀（Irene）介紹隻香薰叫做「1010香薰」，係特登搵香薰師調校出嚟：「我哋要求陣味要自然，要中性，因為我哋客戶有男有女，所以唔可以要花香，唔係男士會唔鍾意。」除咗「1010香薰」，仲有「1010咖啡豆」，只要開聲，就可以嘆到杯香濃咖啡。
有硬件，都要有service先得。呢度推銷員唔係揸住單張係咁sell，而係好in咁揸住部iPad介紹服務，重係CSL千挑萬選出嚟嘅最佳服務員。

推銷員都係靚仔一族

對於OL嚟講最開心嘅，應該係唔少推銷員都係年輕靚仔一族。八方問過Irene，係咪「牛頭角順嫂」都可以嚟先？Irene話無任歡迎，仲話保證服務員唔會由頭到尾打量你一番。

大小便如坐東方快車

無論你「急定唔急」，係咪想去大小二便，八方認為，嚟得呢間1010旗艦店，一定要去廁所（圖）睇吓。無錯，係睇吓！因為真係幾好睇！
呢個茅廁乾淨整齊、滿廁香噴噴、抒情音樂伴你「解決」不在話下。一拉開道門，一個廿幾吋嘅電視屏幕映入眼簾，播放住郊外景色的片段，原來，呢條片大有來頭。
由於成間旗艦店嘅主題係「華麗旅程」，呢條「廁所片」係喺東南亞唯一豪華列車、連接新加坡同曼谷嘅「東方快車」上拍嘅，片中所睇到嘅景色，全都是火車外嘅醉人美景，總之1010希望客戶去大小解時，都好似去緊豪華團咁relax！盡情舒暢地去吧！

mailto:[email protected]