「Sam哥」吳鎮宇喺《衝上雲霄II》嘅斯文有型機師look，相信迷倒唔少觀眾。前日(23日)，「吳鎮宇工作室1221」喺微博向Sam迷表示，同「新浪公益」商議後，決定將《衝上雲霄II》嘅Sam哥戲服進行義賣，義賣日期由噚晚至聽晚，每輪首5名義賣者能夠搵出鎮宇喺劇中穿著同款嘅截圖，就可以得到禮包。但籌得善款點用、係咪捐俾「新浪公益」，就冇詳細透露。

雖然當時只得百幾個Sam迷有反應，不過當Sam哥留言回覆：「終於等到了！新浪開倉義賣。」立刻有三百幾個Sam迷話支持。至於噚晚首輪義賣係11件Sam哥嘅「外套」，當中，似乎星星外套最受歡迎。就連當日被笑指「一件戲服著足16年」、同97年鎮宇拍《難兄難弟》著過嗰件驚人地相似嘅棒球褸，都係義賣品之一。如果賣埋《難兄》嗰件就正喇!咁當然，fans最想買到嘅，都係Sam哥嗰套機長型仔制服啦!

得，諗下好喇!