所謂一念天堂一念地獄，到底蔭權七年，係點樣由煲呔變貪曾，踏上Cheap精之路？

煲呔05年眼見老董遭北京炒魷，佢即時喜上眉梢，喺阿董宣佈腳痛前，煲呔喺政府總部門外吹口哨，得戚得佢呢！

05年、07年參選特首時，喺職業一欄填上政治家，但推出政改方案，卻遭立法會否決，07年就改口號以「我要做好呢份工」競選，原來佢做特首，只係當打份工！

唔好以為只係大話英先識講大話，已故支聯會主席司徒華，喺06年就踢爆過煲呔喺89年曾聲援北京民運嘅《民主歌聲獻中華》。不過呢，阿「政治家」就敢做唔敢認。

07年煲呔為競逐連任，揚言任內會解決普選問題，仲話「大家一齊玩鋪勁」，點知到佢今日落台喇，2017年、2020年雙普選仍然係個問號。呢鋪真係玩得香港人勁！

煲呔孤寒成性嘅嘴臉，喺呢一年開始浮現。08年，佢話如果將700蚊嘅生果金加到1,000蚊，要先經資產審查。毓民即時向佢掟蕉，最終政府收回建議。

香港為咗要起條高鐵去強國，所以鏟平元朗菜園村，村民向咁啱喺元朗食麪嘅煲呔示威，點知佢Cheap到一個箭步避走。Cheap相喺呢個時候開始現形。

09年議員問佢係咪支持平反六四，佢話強國成就驕人、香港從中得益，自己係代表香港人意見，結果「曾蔭權不代表我」將當年六四燭光集會推上廿萬人嘅高峯。

煲呔09年推出慳電膽券，由公帑資助市民買慳電膽，點知俾傳媒踢爆，佢親家經營慳電膽生意，實為輸送利益嘅最佳例子。煲呔變貪曾，喺呢個時候已露端倪。

煲呔上任以來，本港空氣一日差過一日，綠色和平09年將一幅「氣候逃犯」嘅大型海報掛咗喺政府總部外牆，提醒港人，佢老哥競選時吹噓嘅藍天行動冇料到。

龍友Cheap曾2010年去米埔影雀，被揭發鏡頭係由公帑支付嘅公家嘢，公鏡私用，煲呔就解釋話，想寫篇候鳥文章提倡保育。咁你都好得閒啫！

2010年中，煲呔孭着個大聲公，為政改方案落區喪嗌「起錨！起錨！」只記得佢頭髮亂了，青筋現了。呢啲就叫做政治家？

議員黃毓民大聲問佢點解委任林公公做政務司長，煲呔技窮批評對方「十足爛仔」，立法會唔係「黑社會嘅地方」。後來煲呔被揭去澳門食江湖宴，嘩，又話怕黑社會？

Cheap曾被連串踢爆以普通門票價錢乘搭私人遊艇、私人飛機，嘆盡美食佳餚，又以超筍價租用內地超級豪宅，位高權重如此貪心，話佢係「港版陳水扁」點會有錯。

臨落台前被踢爆連番出差搏老命住總統套房，結果遭審計署狠批大花筒，煲呔惟有扮死狗saysorry，仲企圖扮喊博同情，但擠不出一滴眼淚。

mailto:[email protected]