【16：35更新】新增動新聞
【09:10】入境處表示，事件共涉及43名港人，其中2人身亡及9人需於當地留醫及繼續接受治療。

在廣州市南沙中心醫院，據躺在病床年約70歲的周靜儀婆婆表示，她們一行8人往番禺遊玩，並獲安排坐在旅遊巴中前排11至18號座位，事後與另外3友人在同一病房休養，另外4友人在另一醫院。

周婆婆意外後雙眼撞傷腫起，看不見東西，而同行友人嚴重流血，「我就係有樽藥油，塗抺後先止到血，如果等佢架車嚟流血流死咗。」

周婆婆續稱，意外時在座位上入睡，「咩都唔知，都唔知撞到乜，連聲都聽唔到。當時喺架車度又唔暈，返咗嚟醫院先暈，如果喺嗰度暈死鬼埋。」又指等了很久都不見救護車到場，醫護人員動作很慢，與香港不同。

其友人馮少珍婆婆幸好只是撞傷前額，她表示事發前剛進行晚膳，「好攰，『嘭』一聲撞到，啲人呆晒、慌晒，車頂成個塌下，等咗成個鐘頭救護車先到，我哋喺馬路邊度等，好遲，太過慢。」她又批評坐後排沒有受傷的團友，事發後竟沒有向傷者施援手，「後面嗰啲完全無事，都無人理嘅，帶團嗰個又受傷。」

馮婆婆又表示，沒有叫親友到醫院，「要返工搵食嘛」，只希望盡早回港，而旅行社沒有派員接觸，慨嘆不敢再參加此類旅行團。

傷勢較重的劉淑蘭婆婆，當時坐在馮婆婆前方座位，除頭部多處受傷外，可能因失血太多及撞到頸骨，雙手感到麻痺乏力，她向記者講述感受時一度哽咽，「香港我有信心，講真心話，我又退咗休，捱咗幾十年，得閒梗係上嚟行吓啦，係咪先，本來只係返嚟玩，希望可以同佢哋返去，唔好留低我喺度，因為我唔識講國語，二來又唔習慣。」

你敢爆，我敢獎！ 即Call《蘋果》24小時爆相爆片熱線 ：63836568