教院懷疑俾人「蹂躪」嘅聆訊日日有新嘢，內情曲折過電視台啲悶蛋連續劇，梗係多人追睇啦！噚日有位打工仔send電郵畀八方，話唔抵得阿瑟王同佢嘅舊愛將羅太（圖），日日可以孖公仔咁拍住上庭，話晒佢哋一個係局長，一個係ICAC專員，斷估大把公務纏身，點解家吓唔使做？
經過八方查明，羅太依足手續請假，絕對冇抽公帑水，不過單案前後最少要審三個月，即係話呢段時間佢「私務」繁重，正規公事要交由副手處理。雖則呢個世界冇話冇咗邊個唔得，但係拎咁多假去執番上一份工嘅手尾，咁樣份新工都會危危乎喎。至於李局長就當聆訊係公務嘅一部份，即係話用返工時間聽審，所以會加班辦公，分分鐘同煲呔一樣做足24小時，死而後已。