【韓流】當Wanna One遇到「金秀賢」 反應係...
金秀賢Wanna One
出演韓國選秀節目《PRODUCE 101》男團版而出道嘅限定男團Wanna One,佢哋現時喺韓國人氣爆晒燈,當中已經出演過多個綜藝節目,而早前佢哋就為網路電視平台POOQ TV拍攝氣綜藝節目《Wanna City》,節目日前就公開最新預告。
Wanna One現身酒店時竟然遇到前輩「金秀賢」,話說佢哋行入酒店時就見到酒店大堂有個超巨型嘅金秀賢蠟像,金秀賢個蠟像仲張開雙臂歡迎Wanna One到來,原來金秀賢係酒店嘅代言人,所以就有金秀賢蠟像喺現場歡迎賓客。
雖然Wanna One就見唔到金秀賢真身,但佢哋見到金秀賢蠟像都相當高興,成員李大輝先詢問節目組呢個係唔係金秀賢,尹智聖亦插嘴提議大家向前輩問好,朴志訓就最識講嘢:「現實中嘅金秀賢更加帥氣。」
當佢哋議論紛紛之際,金秀賢個蠟像竟然突然講嘢:「歡迎你哋嚟到世界上獨一無二嘅Wanna City,我係金秀賢。」即時令Wanna One大吃一驚。