風水輪流轉，大台事事旦旦俾觀眾鬧到暈，弱台玩鋪勁卻有驚喜，亞視扮嘢節目《香港亂噏》口碑不俗，儼如巨人殺手，雖然收視僅單位數六點，不過網上卻好多人一睇再睇，勁讚呢個係亞視近年最精采節目，八方相信收視率應該未見頂。

網民激讚盧海鵬

《香港亂噏》台柱之一係扮嘢王盧海鵬，以前模仿小鳳姐、欣宜維肖維妙，原來扮高官都有一手，近日佢以教育局局長孫公造型出鏡，睇過嘅人都大讚幾可亂真。最近一集以政府宣傳戒煙為話題，指「教肉局局長孫明洋」搵咗木村托杉為政府拍戒煙廣告，鵬哥扮完孫公再扮木村，模仿止汗劑廣告搔首弄姿。
鵬哥向來專業，扮嘢絕不錫身，學足正牌木村咁露兩點，擺埋殺死人反白眼甫士，直情係高潮所在，好多網民都激讚。既然木村托杉咁受歡迎，八方建議新聞處應該考慮外判政府宣傳片畀亞視製作，好過做埋啲老老土土冇人睇官樣廣告。
http://www.youtube.com/watch?v=lo86HF8tb7g