羅力威於去年新城記者會，因不滿頒獎座位安排而黑面，事隔一年，前晚在九展舉行「新城勁爆躍進．創作搶先獎」，有份上台攞獎的羅力威繼續燶面。
首位上台領取勁爆創作歌手獎的羅力威全程笑容欠奉，接獎後還將獎座放在地上，雙手插在褸袋，狀甚不滿。當他說得獎感受時，才慢慢把獎拿起，強顏歡笑。事後羅力威否認不滿，並表示今次坐的位置很好：「自己有啲唔舒服，因為之前返大陸出席頒獎禮後患感冒，食藥後一路都唔好，所以四肢好攰，知道自己最後講感謝說話，應該鏡頭pan唔到自己，所以將獎放喺地。不過冇所謂啦，呢個係個人特色。」
同場的雨僑與男友羅力威同病相憐，一個是腸胃炎，一個感冒，雨僑說：「只係屙嘔兩日，但嚟緊星期日有半馬比賽，預計應該完成唔到賽事。」男友黑面又將獎座放地下，雨僑維護他說：「今日個獎有啲重。頭先佢喺台上表現，大家就不停望我，我就同大家講，佢呢個正常㗎。」

馮允謙唔認做觀音兵

其他有份奪獎的歌手有馮允謙、鄭俊弘及陳詩慧等，有指馮允謙是吳若希最近的觀音兵，他否認說：「嗰日只係出席一個活動，要返灣仔公司，佢順道車我。」問他是不是怕G.E.M.（鄧紫棋）呷醋？他強調大家只是朋友。而鄭俊弘被問到無綫勁歌頒獎禮會撐阿姐汪明荃或吳若希？他說：「如果一人一票，梗係投畀阿姐啦！」另外，陳詩慧在台上爆喊拎獎，她表示自08年新人出道後，從沒被邀請出席頒獎禮，今次的獎項好重要。
採訪：馬建華
攝影：陳慧安