喀山游泳世錦賽又有好戲睇,雄霸跳水比賽多年嘅中國「夢之隊」,又再失多一面金牌。今屆跳水賽事增設咗三個男、女子混合項目,其中周三舉行嘅全能賽決賽,英國「神童」戴利同佢嘅拍檔嘉蘭特爆冷攞冠軍,陳若琳夾謝思埸嘅中國組合只得第三。
混合全能賽要求每隊各派一位男選手同女選手,每人輪流跳三輪,三米板同10米高台至少要跳一次。身為10米台好手嘅戴利,當然係揀咗跳兩輪10米台啦;其中佢第二跳嘅倒立向後翻騰三周屈體,獲得全晚最高嘅101.50分。戴利同大佢10年嘅拍檔嘉蘭特各自跳晒三輪之後,總成績攞到434.65分,爆大冷力壓烏克蘭同中國對手,贏到金牌。中國繼何姿周二喺女子一米板大熱倒灶後,連續第二日喺世錦賽失金。