呢排英國同西班牙嘅傳媒一條心，係咁吹曼聯門將迪基亞會喺呢個夏天過檔皇家馬德里。咁如果迪基亞走咗，邊個會去做曼聯首席門將？之前有報道吹過馬德里體育會嘅奧比歷，而最新有報道話，曼城嘅赫特都係考慮人選！

唔係啩，曼城球員加盟曼聯？係呀，係英國《獨立報》講嘅。報道話前曼聯領隊費格遜一直好賞識赫特，赫特踢緊梳士貝利嗰陣就想撬佢過檔，點知被曼城簽咗先。至於赫特方面，佢較想喺番英格蘭西北部搵食，如果喺番曼徹斯特就當然最理想啦。雖然曼聯同曼城係宿敵，赫特仲踢過曼城好多年，又係冠軍功臣，但報道話哥迪奧拿已經激到赫特心都淡，佢樂意去曼聯，要喺哥迪奧拿面對證明自己嘅實力。

赫特堂堂係英格蘭國門，但今季被哥迪奧拿嫌棄腳法差，今季外借到意甲嘅拖連奴，表現不過不失，但拖連奴好難買得起同養得起赫特。曼城話赫特嘅身價值1,500萬鎊（約1.5億港元），而赫特嘅周薪12萬鎊，兩者都唔係意甲中游嘅拖連奴孭得起。赫特一心想返英超，如果曼聯唔收佢的話，據報愛華頓都想佢返嚟頂祖爾盧保斯。