自從立法會加咗議席後，連啲小組都好似多咗，今日又有兩個小組出世。第一個係「跟進免遣返聲請統一審核機制有關事宜小組」，一聽個名就知係處理假難民問題，小組共有19位議員加入，今時今日嚟講唔算多，但咁細嘅小組都要有副主席，點解呢？

首先要講番，呢個「假難民」小組19位委員中，民主派只係得6個，1/3都冇。而今日選正副主席之時，民主派亦冇派人出嚟爭。主席人選方面，大家心水清就一定估到肯定係民建聯葛珮帆囊中物，試問議會內仲邊有人夠佢積極跟進呢個問題呢？

八方反而估唔到新民黨容海恩都要做副手。八方問過恩恩豬，佢話平時做當值律師，處理過唔少免遣返聲稱嘅個案，累積咗唔少經驗，所以對呢個小組工作有興趣，自薦做副主席。照八方理解，假難民問題最嚴重嘅地區並唔係新界東，偏偏兩位新東議員最關心，真係有趣。

另一個成立嘅小組就係有關公眾街市嘅，民主黨尹兆堅想做正或副主席，之但係點過到建制派嗰關？結果民建聯柯創盛同工聯會何啟明包攬正副主席。