今次賽馬說故事的主角，為大家揀來了在上季最後一場大熱倒灶的87分「馬跑得」。雖然這匹四歲自購馬抵港後未開勝門，但陣上一再交出極強衝刺，包括上季尾跑田草1200米，造出了43秒5的極快後八百米段速奪季。

既然咁勁，「馬跑得」煞科點輸？無他嘅，我們的前冠軍韋達跑至入彎中段就算步速不慢，但依然心急掟出外叠踩油，入直路後順勢波勾蝕上加蝕，終點前「馬跑得」驚閃，韋達又收都收唔切，結果可以跑到前四都無。今次要講「馬跑得」，主要想帶出「韋達唔得」。

貴為香港13屆冠軍，韋達上季頭馬數字仍不及初出道的蔣嘉琦，季初如有這個「特別盤口」，這個賽果斷估起碼值50倍。說韋達因成績轉差少了好馬騎，看數據一定不是，因為上季仍有58駒被捧成大熱，騎同類馬次數，全港騎師排第三，更經常有類似「馬跑得」的餐士馬，但最終都係令捧場客希望越大、失望越大。遠的不說，以在煞科谷戰配梁家俊僅敗的「可愛寶」為例，四仗前配韋達跑谷草熱門跑到一步都無，結果打後一場換雷神即贏。

曾幾何時，韋達有大熱保衛者美譽，但上季同類馬勝出率只得26%，表現屬騎師中下級，新季能否止跌回升，筆者寧願做淡友。