近來選校長搞到一鑊泡嘅城大，並冇忘記大學要肩負推動學術嘅責任，噚日第二屆城市文學節揭幕，請咗十幾位文壇猛人講寫作心得，好多文化界人士慕名而來，佢哋見到文壇名家董橋、白先勇、張大春、章詒和、劉紹銘等人即刻變晒小fans，爭住搵偶像簽名影相。
喺內地被打為「禁書」嘅，反而越禁越賣得，最近有新書俾大陸查禁嘅章大姐就話冇有怕，皆因佢唔係第一個，亦唔係最後一個被禁，仲話寫作係個人嘅事，唔應該顧慮咁多。面對打壓都冇有怕嘅章大姐，原來最怕影大頭相，「我老啦，太近影不好看。」三日不讀書先語言無味，面目可憎啫，章大姐成日讀書、寫書，實靚啦。