「凡事無絕對！」相信大家聽得多，但係NBA雷霆鐵漢伊巴卡就用行動證明呢句經典安慰說話！
之前伊巴卡因為喺對快艇嘅西岸準決賽嗰陣，左小腿二級拉傷，宣佈今季季後賽唔使再預佢，但係雷霆總經理派斯迪喺上周五就發放好消息，話伊巴卡隻腳嘅腫脹已經極速減輕，隊醫亦冇再實牙實齒斷定佢要長唞，伊巴卡仲有機會喺周日嘅第3戰復出㖭。（now635台明日8:30am直播）

未必趕及Game3上陣

據指伊巴卡目前已經參與緊較為輕鬆嘅投射練習，但被問到佢周日係咪可以復出，派斯迪就懶神秘咁話：「對於呢個問題，最好嘅答案就係話我哋唔排除佢出場嘅機會。」
不過咁，雖然總經理留晒伏線，但係雷霆主教練史葛布克斯就話，球隊唔會預伊巴卡可以即刻好番，所以佢唔會喺周日嘅game plan之內。
喺沒有伊巴卡嘅日子，雷霆頭兩場西岸決賽對住馬刺加埋總共輸足52分，真係慘不忍睹。年事已高嘅柏堅斯明顯支持唔住雷霆條內線，但佢仲死撐，話唔應該將重點放落伊巴卡度，球隊關心嘅應該只係點樣喺主場贏到波喎。
馬刺方面，似乎唔怕伊巴卡復出，主帥普波域治更話對呢個消息完全唔覺得意外，但係都唔會影響到球隊備戰；最近大勇嘅後衞丹尼爾格連仲聲稱，喺首場西岸決賽展開之前，就已經做定心理準備，預計伊巴卡會出場。照咁睇，馬刺對住雷霆真係可以睇定嚟食。