【新增短片】
講起急口令，唔少人可能會諗起大台前財經節目主持林芷彤，而喺聽日嘅兒童節，只要大家有同林芷彤差唔多嘅讀字速度，即係平均每秒讀到約9個字，就有機會贏到一架車！大家無聽錯，真係一架車，不過呢部車，唔可以用嚟揸，皆因係「Tomica指定合金車玩具」！

4月4日兒童節下晝4點至晚上8點，皇室堡地下中庭有個特別活動，只要大家用4.4秒完成一個急口令，就可以獲贈上述玩具車一架及「限定版Tomica DVD」一張；即使挑戰失敗，都有DVD做安慰獎。

主辦單位話呀，當日每人只限參加一次，每次最多有兩次讀急口令嘅機會，不輪大人或細路都一樣玩得。到底句急口令係咩？原來係以下呢句：「成班細路四月四號忙忙碌碌、四秒四內贏到TOMICA無甩轆、皇室堡開心慶祝送出送到足」，大會仲搵嚟Do姐率先嚟個完美示範，Do姐輕鬆用4.4秒完成呢句急口令，唔知大家口齒又有無Do姐咁伶俐？

睇片： https://drive.google.com/drive/folders/1eMnkvhZ2n5aHIqUmaapaNph9arG0wppc

《蘋果》沙士15周年系列網站，正式登場：
https://hk.feature.appledaily.com/sars15/