韓國女星張娜拉之前先拍完韓版《命中注定我愛你》，0依家佢就處於休息狀態，稍後就會開拍新劇《Mr.白》，將於下月首播。

而張娜拉已經同張赫兩度合作，嚟緊佢哋會三度合作，幫MBC電視台拍一部短劇《久違的問候》，佢哋繼《命中》之後再次飾演夫妻，此劇將會於下月9號首播。

張娜拉日前接受綜藝節目《HealingCamp》訪問時，就自爆出道時同韓劇《沒關係，是愛情啊》男星趙寅成合作拍劇嘅經歷，張娜拉自爆當時同趙寅成都好年輕，但即使佢哋相處成10個月，但表現都仍然好生疏，大家見到面都只會講「你好」同「辛苦你」，張娜拉解釋自己唔係好識同人傾偈，亦都好似冇呢種勇氣。

張娜拉母親喺事前亦有錄定視頻，仲留言話：「我個女本身冇朋友，希望佢可以交多啲朋友，早日結婚生仔。」睇住媽咪嘅片段，張娜拉只好話自己希望係37歲(0依家佢33歲)左右先結婚，喺呢個時間之前自己只係想好好工作。

另外，張娜拉亦都係節目中講自己一啲鮮為人知嘅經歷，由於張娜拉好早就成名，之後仲紅到去內地，成為當時最早嘅韓流明星，不過佢就自爆當時自己進軍內地時，患有好嚴重嘅腸炎，亦因為太過緊張，所以先後患過恐慌症、暴食症、畏高症等，佢話：「我得咗好嚴重嘅暴食症，因為呢種不安感又得咗畏高症，有段時間連飛機都唔敢搭，仲會驚到係機艙內尖叫同痛哭。」

所以話做藝人認真唔易，特別係紅嘅藝人，張娜拉亦因為試過太多工作，搞到身體勁差，試過暈喺片場，更加忙到連洗頭嘅時間都冇，佢仲自爆試過同張赫對戲，對方竟然問佢係唔係冇洗頭呢。