睇見港、澳關係緊張，台灣方面反應好快，駐港機構中華旅行社總經理楊家駿日前去信立法會主席曾鈺成，話好歡迎議員隨時訪台，同時詳細介紹申請各種入境簽證程序手續，表現友善熱情，不論黨派，一律中門大開。反觀澳門特首、官員擺出一副嫌棄港人嘴臉，真係睇見就作嘔。
其實自馬英九上場後，香港各政黨都有成員去台灣大玩特玩，連民建聯都唔例外，因為兩岸關係破冰，去台灣不再敏感唔怕政治不正確，其他泛民政黨「攪屎棍」不在話下，社民連毓民更係台灣大好友。今次楊總盛意拳拳，八方認為立法會應該盡快成行，由曾主席組成「議會暴力考察團」，拉大隊去台灣見識吓當地所謂議會暴力文化，睇完後可能諗到好橋對付掃場黨。
立會台灣考察團唔知幾時出發，公民黨秘書長陳家洛噚日卻獲放生入境澳門，佢冇幫襯信德船務，搭新渡輪去澳門，話呢個係消費者權利，唔一定要畀錢姓何嘅賺。陳家洛今次係以學者身份，應亞歐基金會邀請出席一個關於歐洲社會問題嘅學術研討會，議題不涉政治，不過佢都唔放心，怕又俾澳門留難，笑言擔心澳門將亞歐基金會，同程翔案涉及嘅「歐亞基金會」混淆，將佢當做間諜，分分鐘唔係拒絕入境，拉人封艇仲弊！