話說偶像派財演高明睇完小弟篇〈中國點止迷失廿年〉之後，一齊傾過中國經濟係咪步日本後塵，同埋內銀會唔會執笠嘅問題。
不如用個貼身例子去形容內銀情況吧。假設閣下借咗好多卡數，卡數多到個點，淨係還息都已經佔你人工幾成。正常情況下，銀行唔肯借多啲畀你，不過，你欠錢欠着間內銀，佢唔可以逼你破產不特止，仲借多啲畀你還息，亦冇將你條數變成不良貸款，於是你永遠唔破產。
呢間內銀同一時間出現好多呢類債仔，盤數表面上好健全，但其實好多潛在爛賬是強行列為正常貸款，係咪實質負資產？即使今日未係，未來都有可能係。

在於銀行角度，改善資產質素非常難，需知道債台高築嘅客仔，本來就係理財不善，根本冇可能還到。於是內銀處於非常被動嘅狀況，其中一個可能，係睇你有冇能力加人工加得好快，諗多咗咯，經濟唔好嘅時候，冇減人工都偷笑。
內銀資產質素可唔可以改善，仲要睇吓未來正現金流，能唔能夠抵銷實質爛賬嘅上升速度，就算係得，都唔知幾多年先能夠破地獄咯。
篇幅有限，晉佳會喺facebook page講吓博反彈點揀股，有興趣就去睇睇。下期講中國會唔會步日本後塵嘅關鍵。

晉佳
https://www.facebook.com/advanceguy1/