曼聯即將訪港，今次觀塘apm開幕就湊熱鬧、火上加油請嚟曼聯迷最愛嘅簡東拿，加上天王劉德華嘅魅力，引嚟3,000Fans到場。現場簡東拿教吓劉德華踢波，劉德華又教吓簡東拿寫毛筆字，時間好快就過！

錯過咗呢個Crossover嘅曼聯Fans唔使揼心，apm嘅曼聯展覽場地即日展出好多珍貴曼聯展覽品，當中有球員簽名波衫、海報、入場票等近百件罕見珍藏，連已離隊嘅萬人迷碧咸、上季喺曼聯表現大放異彩嘅朗尼都有親筆簽名波鞋展出，估值近千萬元港幣！曼聯迷唔嚟影番張合照，真係唔知幾時再有機會！

時間：即日起至7月31日11:00am-2:00am
地點：觀塘創紀之城5期apm大堂（28512333）

退休嘅簡東拿將商場鬧得火熱，現役班球員偶像就更加唔使講，球迷由早兩個星期開始已經搶定衫，為曼聯到港打氣作準備。波衫舖352大本營的店員話：「皇馬、巴塞訪港都係咁，好多買咗飛入場嘅球迷都會專登嚟買定波衫喺嗰日着住嚟打氣，曼聯一向咁多Fans，近幾個星期每日賣出超過30件波衫，真係印名都印唔切！」
其中可能因為史密夫白白淨又夠火爆，最受曼聯迷歡迎，最多人印佢個名。不過店員相信朴智星將會係今年大熱，因為話晒係亞洲球員，點都要支持吓，而且上星期先熱辣公布佢着13號波衫，新嘢一定有人捧場咁話！

352大本營
（旺角西洋菜南街38至40號萬高商業大廈9樓/27707352）

波衫、波鞋，香港一向好多舖頭賣，但係曼聯精品就來來去去都係旗仔、公仔呢啲。不過乘住曼聯訪港嘅氣勢，當然有醒目老闆出手賺番筆，尖沙嘴LCX就啱啱開咗一個曼聯攤位，大毛巾、足球、電話繩、球星相、海報樣樣齊，而且全部係英國入口正貨。當中一塊扮波衫嘅毛巾就最得意，靚女們裏頭着件比堅尼，再笠呢件毛巾入場打氣，唔只冇咁熱，重定必可以帶起男Fans嘅情緒。睇波最緊要興奮嘛！唔好咁孤寒啦！

截稿前曼聯對港隊嘅門票已經賣出三萬多張，而$380、$980嘅門票更只剩三十多張，要買趁手！不過如果諗住比賽前兩日先決定買唔買飛嘅球迷，都重有$480、$780飛選擇（約剩餘7千多張），即興買飛睇應該都冇問題！

售賣點
香港大球場售票處
門票價錢：$980、$780、$480及$380