倪晨曦（Elva）今日在中環為代言美容店主持開張儀式，多年前亦同為美容院代言人的羅霖亦以嘉賓身份到場支持活動。站在美魔女羅霖身邊，倪晨曦未感壓力，並表示：「我哋第一次見面，要向對方多多學習，佢keep得好後生。」並分享日常保健心得，會做運動、護膚、適量通淋巴。

倪晨曦與圈外男友V先生籌辦婚事，為訂場地苦惱中，她笑言：「搞搞下都唔知結唔結得到，希望可以順利喇，場地目標地方已經有，但礙於交通問題同佢哋回覆進度影響，暫時心大心細，已經轉過兩次地方，預計明年初一月進行婚禮。」倪晨曦已開始找中醫調理身體，坦言為個人健康之餘亦為生育作好準備，她說：「做藝人壓力大，成日四圍飛，身體狀況唔係最佳，身邊朋友過咗30歲都會調理，我都戒凍飲，唔可以夜蒲要早瞓。」很久沒有在大銀幕前與觀眾見面的她近日正開拍電影，飾演一位知性美女。

羅霖將在書展推出相集，已經籌備至尾聲，笑言：「真係做到趴地。」她指在出版方面遇上問題，羅霖說：「已經埋尾，今次好多嘢都係自己去做，包括資金、資料搜集，書商本來承諾喺內地會可以出版，但現時未必出到，我希望佢哋可以履行承諾。揀相方面我見到揀化妝品都佔咗一頁紙，有啲喧賓奪主，希望可以順利解決問題喺內地出版。」羅霖推出相集，湊巧另一美魔女溫碧霞同為寫真出擊宣傳，立時被比較，羅霖說：「大家都攞我哋比較，想講佢係寫真，我係分享食譜、運動等多元化，唔同類型，大家係唔同市場，希望大家銷量都好。」

近日羅霖菲傭放大假，令她一仆一碌，要做家務和工作，又要餵小動物，昨晚她便不慎為保護狗仔跌親，她說：「寧願自己受傷都唔想狗仔骨裂，搞到右邊身跌到瘀咗。」此外，前夫劉坤銘孖新歡撐枱腳，又傳好事近，羅霖回應：「祝佢幸福。」

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX