日本富士電視台安排每逢周一晚9時播出嘅「月9」劇時段，近年收視低迷，現時起用長澤正美擔正《信用欺詐師JP》（Confidence Man JP），收視都未如理想，日前傳出上戶彩將擔演7月新一檔「月9」劇，拍攝《絕對零度》第三季，至於10月檔期有可能搵木村拓哉演出。

報道指木村拓哉自《BG~身邊警護人》之後，人氣有所回升，而今次富士係為迎接東京2020年奥運，打造一部關於奧運嘅劇集，暫定10月播首季、明年7月播第二季，後年4月就會播第三季。

故事講述木村拓哉年輕時係一位有望出戰奧運嘅游泳選手，但因事故導致游泳生涯告終，未婚妻更被好友搶走，人生跌落谷底。直至接近40歲之齡，恩師搵佢轉當教練，木村最終答應訓練一班出戰東京奧運嘅選手，此時佢再重遇舊愛同昔日好友，有指江口洋介同山崎努將會參與演出。

精選娛聞，喺晒《娛果》
http://fb.com/appledailyent