1010BlackBerry免費升級睇《蘋果日報》
蘋果日報 2004/10/20 00:00
好多PDA用家都會用部PDA嚟下載報紙新聞，每日搭車返工就睇餐飽。而一向以收發電郵為主嘅BlackBerry，亦都不甘單單畀用家Check吓電郵咁簡單，日前1010就為BlackBerry再搞新意思，特別編寫《蘋果日報》JAVA程式，用家只需要下載程式之後，就可以上網睇晒成份《蘋果日報》。而BlackBerry顯示嘅《蘋果日報》更有齊文字及圖片，用家亦可以選擇有興趣嘅圖片再放大嚟睇，慳番唔少下載內容時間。1010提供嘅《蘋果》JAVA程式則完全免費供用家下載，費用只係收取GPRS費用，對於唔想拎住份報紙睇嘅用家就啱晒！
■即時股票及指數滙報，啱晒要成日昅住個市嘅用家。
■下載遊戲為港人度身訂做，如《廿一點》及《鋤大D》。
BlackBerry除變身做「閱報器」，方便大家收睇即日新聞外，更立志變成遊戲機，等用家閒時輕鬆一下。用家現時可以隨時利用BlackBerry上網，到1010的WAP網頁下載遊戲。
而最新嘅遊戲就有港人至愛嘅「BlackJack」啤牌類遊戲，當中重包括香港人熟悉嘅《廿一點》及《鋤大D》，寫吓E-Mail之餘，亦都可以打機輕鬆吓，解悶一流。而BlackBerry亦都係金融資訊中心，隨時Check住個指數之外，亦有股票報價，隨時睇住個市，分分鐘幾十萬上落嘅用家就更加唔少得！
記者、攝影：劉耀祥
■BlackBerry支援中文顯示，睇報紙當然唔係問題。
■啱睇嘅相先Click嚟睇，慳番唔少下載時間。