兩個新練馬師羅富全及麥菲文，跑了五次賽事羅富全已贏得四W，而麥菲文至今只跑過「銀豐神駒」，被捧成5倍次熱，但在史卓豐全程兜大圈演繹下慘敗。

兩人手法有別，羅富全土生土長，深明香港馬圈只爭朝夕，大多數馬主耐性有限，所以一開季即打快攻，四場頭馬有三匹由雷神建功，但麥菲文剛剛相反嘆慢板，晨課用人亦以澳洲一族為主，作風似乎與羅富全不盡相同。

周三（20日）晚呢兩個新馬房均有馬出，羅富全「慣勝共贏」、「完美風暴」都係中距離馬，初出跑1200估計只係求熱身，反而麥菲文「領航大師」、「有智者」均出戰本身合適路程。

計賽績當然「領航大師」較優勝，谷草1650取得兩冠一亞兩季，排第1檔賺形勢有機可乘。

至於「有智者」谷草1650只入過一次Q，兩駒不同處係後駒8月已由雷神接手拍跳，試大閘，而最特別之處係麥菲文全倉中唯一的一駒由雷神操，一匹四班馬有如此動態，估計「有智者」想借用雷神之助先打響頭炮以穩定軍心。