地鐵行政總裁周松崗呢排心情勁好，噚日出席立法會交通事務委員會會議，為兩鐵合併解畫，不但有員工大讚佢，連立法會議員都罕有向佢面上貼金，難怪佢全程笑笑口，可謂攞晒彩，盡領風騷。

又sharp又醒　冬冬都捧

話說地鐵公司員工協會代表羅泮威發言，話地鐵經過上巿同沙士等大事，但員工都冇乜受影響，大讚公司應付得好，工會希望今次兩鐵合併，雙方全體員工可以順利過渡。佢咁講，順利過渡嘅當然應該包括行政總裁周松崗啦，威哥仲以英超班霸車路士比喻周總，話「一開盤口，周生實係大熱中嘅大熱。」咁嘅甜言蜜語，周總笑騎騎受晒。
之後立法會議員嫻姐追擊地鐵人力資源總監陳富和，炮轟佢唔肯爽快應承日後成立上訴機制，又唔回應會否喺日後嘅諮詢會度加埋工會代表，態度好「拖磨」，所以建議不如由說話又sharp又醒嘅周松崗回應佢嘅問題。結果全場大笑。
周總聽罷，淡淡定咁話：「呢個問題要搵九鐵一齊答。」意圖將個波踢畀人，可見佢份人幾醒目，識卸力。八方就好同情周總「條𡃁」陳富和，老頂坐喺隔籬，佢答議員問題嘅時候自然要謹慎啲，點知就俾嫻姐抦，真無辜。
唔知係咪受世界盃熱潮影響，連環運局局長冬冬姨都講起波嚟，當有議員批評兩鐵高層福利過高、有肥上瘦下之嫌，冬姨就好鬼馬咁話，喺香港要搵人做公營機構嘅高層，唔係咁易，所以要請車路士級嘅人才，自然要畀車路士級嘅薪酬啦。
冬冬咁幫地鐵，真係恨死隔籬，好彩被煲呔出「紅牌」趕出場嘅九鐵署理行政總裁黎文熹亦唔寂寞，佢原來都係超級球迷，後生時好鍾意踢波，球技係車路士定係南華級數就唔知。

黎文熹去德國睇世界盃

黎文熹話，月底離開九鐵之後，就會同朋友飛去德國睇世界盃，以前只可以喺電視睇，今次終於可以現場睇，睇完世界盃返嚟，又可以打多啲波，不過唔係踢波，而係打golf（好彩佢唔係做賓卡），得閒仲會搭吓九鐵㖭！
一班九鐵管理層噚晚喺酒店筵開十幾席歡送佢，每位科款四百蚊，講明係私人派對，主席田二少未見出現，班夥計仲送咗一幅畫像畀黎文熹，搞到佢話真係好感動。
對於較早前九鐵嘅兵變事件，黎文熹話佢做事嘅宗旨係對自己負責，對公眾負責，佢已經盡咗自己嘅責任，所以冇乜嘢需要遺憾；又話九鐵嘅同事面對兩鐵合併亦唔需要擔心，因為本住專業精神盡心盡意做事，職業自然有保障。兵變就係咁，不成功，便成仁，黎文熹應該一早預咗。
不過，佢今次失敗，極可能係信錯大人唆擺，八方只好奉勸佢以後要帶眼識人啦。

傳真︰2623-9278
電郵︰[email protected]