人物：錢慧儀、錢父錢志強

時間：98年1月

地點：舊山頂道錦園

經過：81年港姐亞軍錢慧儀，94年同大生銀行後人馬清揚結婚晉身豪門，但講到引人注目，就唔及當年同老竇錢志強為錢反目。
98年1月，錢志強突然跪喺女兒寓所樓下，要求對方歸還半山嘉兆臺嘅150萬首期，仲話自己無力供樓，隨時要瞓街。其實層樓係錢慧儀、胞弟同錢父聯名嘅，97年佢哋本想出售單位，最終冇成交。98年10月，嘉兆臺因為欠供款，俾銀行收番。

嫁女當賣女

老竇跪地一事後，錢慧儀一直拒作回應，至99年先打破沉默，哭訴父母當時想買海景豪宅，佢話負擔唔起，父母就話要賣咗嘉兆臺。後來有買家願意用700幾萬買樓，錢慧儀話佢諗住攞番自己畀嗰100萬首期，等父母要用錢先畀番佢哋，錢父不滿，拒絕賣樓，搞到佢要賠番40幾萬定金畀買家。錢慧儀仲攞晒單據出嚟，力數錢父嫁女當賣女。
最戲劇性係錢父搬離嘉兆臺之後，呢頭話要瞓街，嗰頭就俾人踢爆佢搬入深井浪翠園豪宅。01年，錢慧儀胞弟猝死，錢母受訪時話終於明白親情可貴，又承認經濟冇問題。實情係點，真係審死官。
本欄逢周一至周六刊出