1996年上映嘅《天煞地球反擊戰》（IndependenceDay），稱得上係科幻災難片嘅經典，相隔20年導演羅倫艾默烈治（RolandEmmerich）開拍《天煞地球反擊戰：復甦紀元》（IndependenceDay:Resurgence），由謝夫高拔林（JeffGoldblum）繼續飾演拯救人類嘅科學家DavidLevinson，還有生力軍澳洲男星廉安咸斯禾夫（LiamHemsworth）及飾演戰鬥機機師Rain嘅楊穎（Angelababy）等。

Angelababy以香港女星身份參演耗資15億港元拍攝嘅《天煞地球反擊戰：復甦紀元》，今次地球被前所未見嘅高智能外星人再度襲擊，全片標榜驚心動魄嘅災難場面。導演羅倫艾默烈治由96年嘅《天煞地球反擊戰》開始，先後拍過《哥斯拉》（Godzilla）、《明日之後》（TheDayAfterTomorrow）、《2012末日預言》（2012）等作品，對拍災難片可謂樂此不疲，難怪今次片尾已鋪定路開拍《天煞3》。

近年荷李活大製作紛紛加入亞洲元素，尤其為針對中國市場就例必起用華人演員參與演出，今次Angelababy所佔戲份由頭帶到尾，可算勝過「雙冰」李冰冰、范冰冰。Baby飾演來自中國嘅戰鬥飛行員Rain，係五位年輕要角其中一位戰鬥飛行員，從頭到尾斷斷續續不時會出現，Baby也有開砲擊落敵機嘅大特寫畫面，喺片中深得男星TravisTope歡心同展開追求，不過Baby嫌對方太過細路，累計Baby出現時間至少5分鐘。

Baby一登場用國語講：「希望這個能夠代表世界統一的隊伍。」之後都主要操英文對白，雖然每次開口都一句起兩句止，但加起來總共有23句！相比起范冰冰喺《變種特攻：未來同盟戰》（X-Men：DaysofFuturePast）入面全無對白簡直贏足幾條街，比《變形金剛：殲滅世紀》（Transformers：AgeofExtinction）中嘅李冰冰亦略勝一籌。

猶記得《變形金剛4》中出現嘅內地植入廣告，今次新片都同樣突兀，一幕男主角廉安喺太空飯堂場面，竟大特寫佢攞起蒙牛鮮奶，比起上集射可口可樂汽水罐，今次植入廣告嘅手法明顯低手得多。