當年今日
關於我們

地產多聲道:大行選傑出主管兼造勢

蘋果日報 2002/01/15 00:00


平日聽地產代理介紹樓盤就聽得多,近排興嚟一招主管推介,即係主動介紹成績突出嘅代理行阿頭,好似噚日咁就收到兩份分別嚟自中原同香港置業嘅新聞稿,都係硬銷傑出經紀主管。
先講香港置業01年最佳主管西九龍助理區域經理曹仲康,佢用咗300幾萬買入一個大角嘴帝柏海灣面積800幾方呎嘅單位自住,理由係佢睇好嗰區嘅發展,同埋為咗方便工作咁話。佢重有一句嘅口號:「做到邊、住到邊」,又話今年樓市會比舊年好,家陣正係入市良機,完全流露經紀本色。
至於中原就以新晉主管巡禮為題,逐日推介新任阿頭。頭炮係西貢匡湖居分行經理劉國輝,此君96年入行,其間曾為城中富豪劉鑾雄賣出麗匡湖超豪洋房,亦屢獲中原精英會獎項,踏入第六年就升做分行主管。
𠵱家個市都未算好景,代理行用新招介紹行業境況,順帶幫個別地區樓市造吓勢,都可謂用心良苦。
蘭西