當年今日

【名家搶先睇】獅子行唞完氣再上(譚紹興)

蘋果日報 2016/12/08 18:45

滙控大行譚紹興投資學堂

上月本欄以《滙控無懼大媽沽貨》為題,談到內地資金透過港股通,由早前大手掃入,改為減持滙控(005),逐步減持至持股量不足3%。但奇怪的是,北水減持滙控,非但沒有令大笨象下跌,反而越沽越升,當時筆者便指出有另一批大戶承接了中資的沽盤,所以滙控升勢仍有後勁!
直至近日,多間大行齊齊大合奏唱好滙控,筆者察覺這些大戶掌握買貨的timing,真是登峰造極,唔遲唔早,剛剛買齊貨,大行便一同吹雞建議吸納滙控,又會咁巧合!
過往滙控的股價走勢,與美國三大銀行Wells Fargo、JP Morgan及花旗等大致相若,雖然近日大笨象已開始跳舞,但仍跑輸給美國同業,例如過去一個月美國三大銀行的平均升幅達22%,而同期滙控只10%左右升幅,筆者估計在聖誕鐘響起「前」,滙控仍有一定升幅,但在大行的合奏後可能要小休,才能再展升浪,情況正如早前大行合奏唱好內險股一樣。
近期美股屢創新高,市場可謂對特朗普選舉承諾作120%超額憧憬所致,當中包括一、取消嚴厲的Dodd-Frank銀行法例;二、動用5,000億美元作基建刺激經濟;三、對美國的藥品價格較寬鬆。若特朗普明年就任時,對這三大承諾有任何一條遺留,美股分分鐘會出現過山車場面,所以近期不少歐美大戶均大手吸納美國恐慌指數VIX的期權及期貨,以作保險。
掌握財經生活資訊,即Like「蘋果ATM」fb專頁啦!
http://fb.com/appledailyatm