容海恩同北區，似乎結下不解緣，之前就喺選舉論壇因為北區嘅水貨問題露底，一句「咁飛嗰啲呢？」名噪一時，點知呢個政途嘅「禁區」，竟然係容E首個議員辦事處嘅落腳點，大膽殺入上水開鋪大吉。由於佢呢個議辦亦係新民黨嘅上水社區辦事處，所以主席葉劉淑儀同副主席潘國山等今日都有出席揭幕禮，估唔到容E魅力驚人，獲財爺陳茂波同食衞局局長高永文大駕光臨。

容E致辭時感謝嘉賓風雨中撐場，話去年10月上任至今一直努力搵地方開鋪，終於搵到上水，深明唔少區議員多年來搵唔到落腳地之苦，希望政府多啲支援，佢仲話北區出市區嘅主要幹道經常大塞車、地區單車泊位不足以及公共街市加租等，都係積極重點跟進嘅議題。