當年今日
關於我們

【短片】【今飛溫哥華赴婚宴】李亞男訂定裙做姊妹口密唔講嘉欣老公

蘋果日報 2016/02/25 06:00

蘋果鍾嘉欣李亞男即時溫哥華Jeremy

李亞男喺下午3點左右,單人素顏現身機場,喺國泰頭等櫃位辦理登機手續,之後佢大方接受訪問,表示老公王祖藍身在米蘭工作,未有同行,此行亞男透露係專登訂造姊妹裙參加鍾嘉欣婚宴,之後會逗留溫哥華兩星期。

講到送禮方面,亞男話:「我過去就係禮物啦,我會做姊妹。」嘉欣係咪即將做媽咪?幾時會返香港?亞男對一切都好口密,只話:「唔清楚,我都係睇報導咋。」見過嘉欣老公未?亞男話:「唔太認識,佢哋好低調,又唔知有冇過嚟香港,都冇機會meetup。」

傳聞去年底婚禮上亞男、岑麗香、王君馨和苟芸慧都係姊妹,亞男話:「嗰次只係簡單儀式食飯,冇姊妹,今次我就做姊妹,會喺婚宴唱歌。」亞男形容今次係細型低調擺酒,問會否再回香港補擺?亞男都係話「唔知」。

亞男話為朋友守住秘密好辛苦,依家當事人公開咗放鬆哂,亞男又話:「我連爸爸媽媽都冇講o架,只係話返去探佢哋,今日先同爸爸講呢件事。」

之後亞男就入閘即到國泰貴賓席,到3點50分開閘口直入頭等機艙。