中銀香港（2388）前日創下52周新高18.66元後，因總裁和廣北減持股份消息曝光，股價昨日即急瀉7%，收報17.24元。管理層減持手上股份，亦算係對自己一種「派彩」，在市場「提款」，天公地道，又唔係向國家「伸手」，有乜問題？以前思捷環球（330）管理層曾經沽貨沽唔停，但一樣無礙股價向上，及後受金融海嘯冲擊，股價崩散則係另一回事。所以，中銀香港昨急跌，似乎係市場反應過敏！

以中銀為例，股價已重返去年股災前水平，長期抗戰散戶見到愛股能夠爭氣向上，心理上會覺得付出時間持有都值得。換轉其他曾經滄海之股份，家陣仲係載浮載沉，感覺就唔太舒服。
好似滙源果汁（1886）今年3月中因不獲商務部批准與可口可樂「聯婚」，股價由10元樓上插到最低3.88元，其後雖反彈上6.70元左右，但表現唔算搶眼。近日該股公佈中期業績倒退82%至6674萬元，由於唔使「見紅」，總算令股價由近期低位喘定，昨逆市升3.7%，報5.39元，重上10日及20日線，似有心振作，可望多眼。不過目前阻力在50日線約5.65元水平，要成功突破才能展開大升浪，否則滙源要追回大市升勢，重返年初舊地，路途仍遠。
方星俠