講咁耐，呢份工薪水有幾多先？新入職月薪14,935蚊，頂薪可以加到去16,855蚊，兩年合約，有約滿酬金。八方見到呢份工似乎都幾吸引，做過功課，發現佐敦恒豐酒店咖啡室最近聘請部長，同樣要求有中五程度及五年經驗，月薪11,900元，人工低啲，勝在酒店包埋伙食，每日工作9小時，平均即係有55蚊一個鐘；相比之下，去立法會冲咖啡係咪筍工，大家可以自行判斷。呢份工本月19日截止申請。
八方早前同立法會秘書長吳文華傾偈，原來秘書長對咖啡要求好高，心願係立法會咖啡成為全港第一，難怪咁緊張請冲咖啡高手坐鎮。事實上唔少議員、官員都對立法會咖啡讚不絕口，白鴿黨李永達必定冲杯靚咖啡先開會，醇厚嘅咖啡香味，搞到八方即時咖啡癮起。
立法會現時無咖啡閣，僅在前廳有部咖啡機，據講由於近年「拉布」馬拉松式會議越來越多，議員要提神，咖啡機俾人㩒到殘，疑因操勞過度而不時壞機，秘書處借咗兩部新機返嚟，俾議員試吓邊部冲嘅咖啡啱口味。
mailto:
[email protected]