英國天后級歌姬Adele早前宣佈唔再搞世界巡唱，可能因為咁就更加渴市，有指美國賭城豪華酒店Wynn開出一場50萬美金（約390萬港幣）天價，請她進駐開個唱，估計只要一星期唱一場，Adele一年就能有約2億港幣入袋。

根據英國《每日郵報》，賭城近年競爭激烈，每間頂級酒店都希望能請到天后駐場騷，之前凱薩宮搵到Celine Dion同Mariah Carey，荷李活星球酒店就請到Britney Spears。賭城嘅Wynn集團唔想落後於人，於是想請嚟Adele出山，更將價錢開得比Celine Dion仲高，刷新賭城紀錄。

有指賭城酒店老闆一早就想搵Adele，但幾年前佢專注家庭生活，唔想英國美國兩邊走，後來又開始自己嘅全球巡演，而家巡演已完成，正係最佳時機。消息人士指出，賭城老闆甚至將Adele最在意嘅健康狀況都諗埋，之前Adele因聲帶受損要取消演唱會，Wynn開出嘅合約中都特別註明Adele可以隨住自己嘅健康狀況隨時做出調整，唔使擔心抱病上陣，又有豐厚酬勞，一切都只係等天后答應。